Անկյունային հաճախություն

Անկյունային հաճախությունը (ռադիանային հաճախություն, շրջանային հաճախություն, ցիկլիկ հաճախություն), սկալյար ֆիզիկական մեծություն, որով արտահայտվում է պտտական կամ տատանողական շարժման հաճախությունը։ Պտտական շարժման դեպքում անկյունային հաճախությունը հավասար է անկյունային արագության վեկտորի մոդուլին։ ՄՀ համակարգում անկյունային հաճախությունն արտահայտվում է ռադիան/ վայրկյանով, իսկ չափողականությունը հակադարձ համեմատական է ժամանակին, քանի որ ռադիանը չափողականություն չունի։ Անկյունային հաճախությունը տատանումների փուլի ածանցյալն է ըստ ժամանակի՝

$\omega =\partial \varphi /\partial t\,$:

Այլ տարածված նշանակում է $\omega ={\dot {\varphi }}$:

Անկյունային հաճախությունը (ռադիանների թիվը վայրկյանում) f հաճախության (պտույտների կամ տատանումների թիվը վայրկյանում) հետ կապված է

$\omega ={2\pi f}\,$

կամ, աստիճանով արտահայտած՝

$\omega ={360f}\,$

առնչությամբ։

Թվային արժեքով անկյունային հաճախությունը հավասար է 2π վայրկյանում տեղի ունեցած տատանումների (պտույտների) թվին։ Անկյունային հաճախությունը թույլ է տալիս պարզեցնել տեսական ֆիզիկայի և էլեկտրոնիկայի շատ բանաձևեր։ Օրինակ, LC տատանողական կոնտուրի ռեզոնանսային անկյունային հաճախությունը $~~\omega _{LC}=1/{\sqrt {LC}}$ է, իսկ «սովորական» ռեզոնանսային հաճախությունը՝ $~~f_{LC}=1/(2\pi {\sqrt {LC}})$:

Տես նաև

• Հաճախություն
• Անկյունային արագություն