Ստեփան Բադալյան
- Վիքիպեդիայում կան հոդվածներ Բադալյան ազգանունով այլ մարդկանց մասին։
Ստեփան Վարդգեսի Բադալյան (դեկտեմբերի 24, 1931, Սևան, Հայկական ԽՍՀ, ԱԽՖՍՀ, ԽՍՀՄ - 2007, Գյումրի, Հայաստան), հայ երկրաֆիզիկոս։ Երկրաբանահանքաբանական գիտությունների դոկտոր (1988), պրոֆեսոր (1994):
| Ստեփան Բադալյան | |
|---|---|
| Ծնվել է | դեկտեմբերի 24, 1931 |
| Ծննդավայր | Սևան, Հայկական ԽՍՀ, ԱԽՖՍՀ, ԽՍՀՄ |
| Մահացել է | 2007 |
| Մահվան վայր | Գյումրի, Հայաստան |
| Քաղաքացիություն |  ԽՍՀՄ և  Հայաստան |
| Կրթություն | Երևանի պետական համալսարան |
| Գիտական աստիճան | Երկրաբանա-հանքաբանական գիտությունների դոկտոր |
| Մասնագիտություն | երկրաֆիզիկոս |
Կենսագրություն
խմբագրելՍտեփան Բադալյանը ծնվել է 1931 թվականի դեկտեմբերի 24-ին, Սևան քաղաքում։ Հետագայում ընտանիքը տեղափոխվել է Երևան, որտեղ նա 1949 թվականին ավարտել է 26 կոմիսարների անվան դպրոցը։ 1954 թվականին ավարտել է Երևանի պետական համալսարանի երկրաբանական ֆակուլտետի երկրաֆիզիկայի բաժինը՝ ստանալով երկրաբան-երկրաֆիզիկոսի մասնագիտություն և նույն թվականին գործուղվել է աշխատանքի Ուրալի երկրաֆիզիկական արշավախումբ[1]։ 1961 թվականին ՀԽՍՀ ԳԱ Երկրաֆիզիկայի և ինժեներային սեյսմաբանության ինստիտուտի հրավերով տեղափոխվել է Լենինական, որտեղ աշխատել է որպես գիտական քարտուղար (1961-1964), հանքային երկրաֆիզիկայի բաժնի վարիչ (1966-1989), գիտական գծով փոխտնօրեն (1972-1973, 1978-1981), տնօրեն (1973-1978, 1981-1989): 1972 թվականին «Ընդգետնյա էլեկտրահետախուզություն հարուցված բևեռացման մեթոդով» թեմայով պաշտպանել է թեկնածուական թեզ՝ ստանալով տեխնիկական գիտությունների թեկնածուի աստիճան։ 1988 թվականին պաշտպանել է «Ընդգետնյա երկրաֆիզիկական մեթոդների ֆիզիկաերկրաբանական հիմունքները հանքային ֆորմացիաների հիմնական տիպերի ուսումնասիրման դեպքում (ՀԽՍՀ հանքավայրերի օրինակով)» թեմայով դոկտորական թեզ։
Բադալյանը հեղինակ և համահեղինակ է բազմաթիվ գիտական հոդվածների և 3 մենագրությունների։ 1986 թվականին տպագրել է Երկրաֆիզիկայի և ինժեներային սեյսմաբանության ինստիտուտի 25-ամյակին նվիրված հուշագիրքը։ Ստեփան Բադալյանը զգալի ավանդ ունի Հայաստանում ընդգետնյա երկրաֆիզիկայի զարգացման, մետաղային օգտակար հանածոների հետախուզման արդյունավետությունը բարձրացնելու գործում, մեծ ներդրում ունի ՀՀ ԳԱԱ Երկրաֆիզիկայի և ինժեներային սեյսմաբանության ինստիտուտում գիտական նոր ուղղությունների զարգացման, գիտական նոր ստորաբաժանումների կազմակերպման, գրադարանային ֆոնդի հարստացման, ինստիտուտը երիտասարդ կադրերով համալրելու, գիտության և արտադրության կապի ամրապնդման գործում։ Դասավանդել է Գյումրիի պետական մանկավարժական ինստիտուտում[2]։
Անդամակցություն
խմբագրել- ԽՍՀՄ հետախուզական երկրաֆիզիկայի Գիտական խորհրդի Երկրի էլեկտրականության և էլեկտրամագնիսական մեթոդների ուսումնասիրման բաժանմունքի անդամ։
Պարգևներ
խմբագրել- ՀԽՍՀ Գերագույն խորհրդի նախագահության պատվոգիր։ ՙ
- Աշխատանքի արիության համար մեդալ։
- ՀԽՍՀ ԳԱ Գովասանագիր և այլ պատվոգրեր։
Երկեր
խմբագրել- Շիրակի գիտնականների գործունեությունը կենսագրականներում։ Ս. Վ. Բադալյան, Երևան, Տիգրան Մեծ, 2009։
- Подземная электроразяедка на рудных месторождениях Армении, Е., 1980 (համահեղինակ)։
Ծանոթագրություններ
խմբագրել- ↑ Ով ով է. Հայեր. Կենսագրական հանրագիտարան, հատոր երկրորդ, Երևան, 2007, էջ 190։
- ↑ «Ստեփան Վարդգեսի Բադալյան (ծննդյան 80-ամյակին) (1931 – 2007). ՀՀ ԳԱԱ Տեղեկագիր. Գիտություններ Երկրի մասին, 65 (1-2), էջ 55-56. ISSN 0515-961X». Արխիվացված է օրիգինալից 2019 թ․ հունիսի 5-ին. Վերցված է 2019 թ․ հունիսի 5-ին.
 | Վիքիդարանն ունի նյութեր, որոնք վերաբերում են «Ստեփան Բադալյան» հոդվածին։ |